D “Schwainegrippe” an der Basler Fasnacht 2010

die Penetrante 2010
Das Kontingänt zem Impfe,
Sii das macht is Mie.
Es längt im Leimetal grad fir zwai Fäll in Flüh.
Bi dääre Blaanig kriege s die wo wänn in Duggige,
bis zu der Oschtere, kurz noo de letschte Zuggige.

s`Dootebainli 2010
Haa-Finf-Enn-Ains, Haa-Ains-Enn-Ains s isch ainerlai
So Gribbe-Viire sinn sau gfeerlig und sau glai
E soo ne Viirus springt dangg Dreppfli-Infektioone
Diräggt vom Albatros uff d Diefsee-Anemoone
Vo deert uff Nesseldier, uff Gräbsli, Artischogge,
Gumpt vo Giraff zu Känguruh, blibt deert kurz hogge
Naggtmuul, Krokodil, Okapi, Dromedaar
Alli Veegel, Amsle, Drossle, Fink und Star,
Denn wird är vo dr Faarma-Induschtrii entdeggt
Und in e groossi Angscht-git-Gäld-Kampagne gschteggt
Doch dä Erfolg und Druubel machen en komfuus
Är flichtet zrugg vo Hund zu Katz zu Fläädermuus,
Zu Stinggdier, Kolibri, Gryzspinne, Kakadu,
Kapuziner-Äffli, Schwärtfisch, Gryff und Gnu
Mir kennte jetz dr ganzi Zolli do besinge
Und au no s aint und ander Faabelwääse bringe
Doch dr Grundgedangge hänn Sii jetz verstande
Mir mien mit däm Bangg jo irgendwie no lande
Dä Virus hipft vo Dier zu Mensch zu Dier und macht so syyni Runde Und wird uns bald als näggschte Grippe-Bäär uffbunde.

dr Peperoni 2010
In jedem guete Job verglemmi,
händ mer hit e Schwoobeschwemmi.
Iiberaal wird hochdytsch gschwätzt, do froggsch di: Mues das syy? Scho schaad dass es kei Impfig git, geg soone Pandemie!

s`Anggewegglimaitli 2010
Am Färnsee do het soon e komischi Sippe
Aim zaigt, was me mache sott bi Schweinegrippe
S Wichtigschte sygi scho: D Händ ganz guet netze,
Denn Söipfe druff! – Ka mir das ain ibersetze?

dr Fährimaa 2010
Die Sau isch maager bis uff s Gerippe
nach überstandener Schweinegrippe
trifft s jetz no e zwaity, lutt Chemie
handlet sich s um e Pandemie

d`Gardischte 2010
Die Sau isch maager bis uff s Gerippe
nach überstandener Schweinegrippe
trifft s jetz no e zwaity, lutt Chemie
handlet sich s um e Pandemie

Impressione vo dr Basler Fasnacht 2010-03-02

Ihr „mymedi Team“